Moin, un wia isset?
Hie owen es et emmer twei Grad köller as em Dahl. Et könnt ook wear aanfangen tu schneien. Es meck awwer egal. En twei Weeken es Fröhleng, es kieken ob dä seck aan dat Datum hölt.

Gelewtet Platt.
Wia wor dat medm Begröten?
Vie hadden jo fastgetallt, datt de Lütt ook es meahr kallen biem Begrööten, wennse seck ook en bötschken kennen.
De deepste Form vanne Begrötung es jo: "Tach"
Dann koom ook: "Tach, wia isset?"
Bliewt dä angere interessiert, dann koom jo dat: "Et mod"
Hä had dann de Uutwahl, kallt hä widder, dann hät hä Tied. Dann mod hä de Gegenfrage stollen: "Un selwer?". Dat "un" es soa wechtig, dat leitet ein, datt et no völl tu kallen gefft. Dohenger steckt en groatet Interesse am angern.
Hä kann dat "un" med Frogen, besongerer Art verköpfen, wia: "Un, wat maaken de Blagen?" Or: "Un, wat mackt et Krütz?".
Hie zeigt dä angere, dat hä deck kennt, datt hä seck ereneert. Hä mod wessen, dattet medm Krütz häs, modse em schoan es vertollt hann.
Getz hässe de Uutwahl. Wellse en lange Kallerei or mackse hie Schluß? Gehsse iihn op de Frage, dann kannse getz vanne Ärzte ztu vertollen. Saisse ehm bloas:"Es Driete" or "Et geit", werd et korte Saake.
Wellse völl vertellen, dann modset ook reit aanfangen. Do kass dann en groates Problem med de Gesondheet soa iinleiten: "Hau..." Med "Hau" modse aanfangen wennet besongers schlemm es. "Hau, eck woar eene Röhre" Getz gehsse dovan uut, datt de angere weet wat de Röhre es. Or, do macks deck wichtig, de Röhre kresse bloas wenne däm Orthopäde op en Sack gegangen bess.
De angere kann getz widdermaaken: "Un, wia wor et?". Getz kannet loss gon. Getz hässe et geschafft, getz vertäll. Am besten do fängs med: "Ha nu..." aan. Med "Ha nu" zeigsse datt no völl kömmt.
Dä angere darf deck getz awwer nitt ongerbreeken. Vertell vanne Röhre, datte op dä Termin soa lang gewaard häs un, un, un.

Vie lewen un kallen hie noh Regeln, dia vie als Kenger van de Aulen afgekieken hannt, modse deck bloas dran hollen... "Han nu..."

Eck mien, dat dat Platt bloas lewt wennet Spass makt un do es kallst. Mer möten de Lütt draan föhren, awwer nitt med Bööker, med Spass.