"Nitt jeder, dä de Grippe emm Balg heet, ess u-ech enn Ferken."
(En Obram)

Twei Früng on enn Bär

Twei Früng gelowden sech geense-itech, sech enn allen Fällen bie te stonn on Freud on Li-ed meddenanger te dielen. Su gongen se dann tesamen op Wanderschaft.

Plötzlech kohm’en op nem engen Wauldwäch enn Bär entgeen. Tesamen hätten se änn vleits betwongen, do äwwer dämm i-enen sinn Lewen te li-ew woar, verli-ete, u-ech sofort vergeetend, watt he kott vörrher versproken hatt, sinnen Früng on klomm op enn huhen Bu-em. Wie sech dä Anger nu so verlohten sooch, hatte ku-em noch Tied, sech platt op dänn Boorem te schmieten, ömm sech du-ed te stellen, weil he gehu-et hat, datt dä Bär king Du-eden freeten wü-ed.

Dä Bär kohm nu aan, leckden däm Doli-egenden die U-eren, schmi-et änn mett der Schnute enn paarmol römm on trabden dovann, weil’en förr du-ed hi-el.

Subaul die Gefahr vörbie woar, sti-ech dä Angere vam Bu-em eraff on frohden sing Kompenei nöüschierech, watt ämm dä Bär dann wall ennet U-er gefüstert hätt?

„En pleestergu-ede Warneng“, krääche ter Antwort, „nur schad, datt ech die nitt früher gewoßt hann.“
Mr sü-el sech nitt mett Menschen ennlooten, die ähre Früng enn dr Nu-ed verlooten.

Nach Aesop ( enn Platt ü-ewersatt vam manos)

Jupiter on die I-emen

De I-emen, onwellech drü-ewer, datt se bloß förr die ondankbaren Menschen arbi-eden su-elen, breihten dämm Jupiter, Waben vam Feinsten tem Geschenk on bedden änn ömm die Gnad, he mäut ähren Stachel su uutgestaulen, datt’e orentlech derwe Ping verursachen kü-en.

„Su sall ett sin“, seiht dr Jupiter, tämlech grimmich ü-ewer die Rachgier vann dänn su kli-enen Di-erkern, „äwwer su, datt gett u-ech tegliek mett önkerm Stachel önker Lewen looten mötten.“

Loot Dech vam Hass niemols betören, denn sing Folgen können dökkes förr Dech selwer gefö-erlech wäeren.

Nach Aesop (en Platt ü-ewersatt vam manos)